सिंधुदुर्ग जिल्ह्यातील बांदा-सटमटवाडी परिसरात मृत माकडे आढळल्याने ‘माकडताप’ (Kyasanur Forest Disease) पसरण्याची भीती निर्माण झाली आहे. या पार्श्वभूमीवर आरोग्य यंत्रणा सतर्क झाली असून पुण्यातील वैद्यकीय प्रयोगशाळेच्या पथकाने घटनास्थळी भेट देऊन सखोल तपासणी सुरू केली आहे.
या पथकाने खबरदारी म्हणून पीपीई किट परिधान करून परिसरातील शेकडो गोचीड गोळा केल्या आहेत. माकडतापाचा प्रसार प्रामुख्याने गोचीडांमार्फत होत असल्याने, हे नमुने तातडीने पुण्यातील प्रयोगशाळेत पाठवण्यात आले आहेत. या तपासणीचा अहवाल पुढील आठ दिवसांत प्राप्त होईल, ज्यावर पुढील कार्यवाही अवलंबून असेल.
दरम्यान, डिंगणे-बांबरवाडी येथेही मृत माकडाचे अवशेष आढळल्याने नागरिकांमध्ये भीतीचे वातावरण आहे. वन आणि आरोग्य विभागाने या अवशेषांची योग्य विल्हेवाट लावली आहे. आरोग्य प्रशासनाने नागरिकांना जंगलात जाताना काळजी घेण्याचे आणि ताप किंवा अंगदुखी जाणवल्यास त्वरित डॉक्टरांशी संपर्क साधण्याचे आवाहन केले आहे. विभाग परिस्थितीवर बारीक लक्ष ठेवून आहे.
