रायगड जिल्ह्यातील अपघातांत घट

Share This Post

 

सर्वोच्च न्यायालयाच्या निर्देशानुसार पनवेल प्रादेशिक परिवहन विभागाने विविध सरकारी यंत्रणांच्या मदतीने रस्त्यावरील अपघातांची संख्या कमी करण्यासाठी वेगवेगळ्या उपाययोजना केल्यामुळे सन २०१८च्या तुलनेत २०१९मध्ये रायगड जिल्ह्यातील रस्ते अपघातांत २८ टक्क्यांनी घट झाल्याचे आढळून आले आहे. त्यामुळे रस्ते अपघात रोखण्यात संपूर्ण महाराष्ट्रात रायगड जिल्हा अव्वल ठरला आहे. राज्याचे मुख्यमंत्री उद्धव ठाकरे यांनी याची दखल घेऊन रायगडचे जिल्हाधिकारी व पनवेलचे प्रादेशिक परिवहन अधिकारी यांचा मुंबईतील एनसीपीएमध्ये सोमवारी पार पडलेल्या कार्यक्रमात सन्मान करण्यात आला.

देशात तसेच राज्यातील रस्ते अपघातांच्या संख्येत, त्यातील मृत व जखमींच्या संख्येत मोठ्या प्रमाणात वाढ झाल्याने सर्वोच्च न्यायालयाने देशातील रस्ते अपघातांची संख्या कमी करण्यासाठी विविध उपाययोजना करून किमान १० टक्के अपघात कमी करण्याचे स्पष्ट निर्देश दिले आहेत. त्यासाठी जिल्हास्तरावर पोलिस अधिकारी, रस्त्यांची देखभाल करणारे संबंधित विभागातील अधिकारी व परिवहन विभागाचे अधिकारी (आरटीओ) यांचे विशेष पथक तयार करून प्रत्येक प्राणांतिक व गंभीर अपघातांच्या घटनास्थळाचे शास्त्रीय विश्लेषण करण्याचे तसेच अपघाताचे नेमके कारण शोधून पुन्हा त्या ठिकाणी अपघात होऊ नये, यासाठी उपाययोजना करण्याबाबत रायगडचे जिल्हाधिकारी डॉ. विजय सूर्यवंशी यांनी स्पष्ट निर्देश दिले होते.

त्यानुसार पनवेल प्रादेशिक परिवहन विभागाने गेल्या वर्षी सर्व रस्त्यांची पाहणी करून या रस्त्यावरील अपघात प्रवण ठिकाणे शोधून काढली. या पाहणीत रायगड जिह्यातून जाणाऱ्या राष्ट्रीय महामार्गावर ३६, राज्य महामार्गावर ३, एक्स्प्रेसवेवर सहा, तर अन्य रस्त्यांवर तीन अशी ४८ अपघात प्रवण ठिकाणे आढळून आली. त्यामुळे पवनेलचे आरटीओ लक्ष्मण दराडे यांनी जिल्ह्यातील इतर यंत्रणांना सोबत घेऊन या ४८ अपघात प्रवण ठिकाणांवर होणारे अपघात रोखण्यासाठी आपत्कालीन उपाययोजना केल्या. यात गतिरोधके, धोक्याचा इशारा देणारे फलक उभारणे. त्याशिवाय रस्त्यावरील सुरक्षा, नागरिकांची सुरक्षा व अपघातांचे प्रमाण कमी करण्यासाठी वाहनचालकांमध्ये जनजागृती करणे, तसेच वाहतुकीच्या नियमांचे उल्लंघन करणाऱ्या वाहन चालकांवर तत्काळ व कठोर कारवाई करणे आदी उपाययोजना केल्या. त्याचा परिणाम होऊन रस्त्यावरील अपघातात मोठ्या प्रमाणात घट झाली.

२०१८ मध्ये रायगड जिल्ह्यातील विविध रस्त्यांवर झालेल्या ७९८ अपघातांत २३३ जणांचा बळी गेला होता. तर ८६५ जखमी झाले होते, मात्र २०१९ या वर्षात ७१८ अपघातांच्या घटना घडल्या असून त्यात १६१ जणांचा बळी गेला. ८०५ जण जखमी झाल्याचे आढळून आले. २०१८च्या तुलनेत या २०१९मध्ये अपघातांच्या संख्येत १७ने तसेच मृतांमध्ये ७२ने, तर जखमींमध्ये ६०ने घट झाल्याचे आढळून आले. अशा पद्धतीने पनवेल आरटीओने सर्वोच्च न्यायालयाने १० टक्के अपघात कमी करण्याच्या दिलेल्या उद्दिष्टांपेक्षा अधिक अपघात रोखण्यात यश मिळविले आहे.

मुख्यमंत्र्यांच्या हस्ते सन्मान

अपघात रोखण्यात रायगड जिल्हा राज्यात अव्वल ठरल्याने राज्याच्या परिवहन विभागाने याची दखल घेतली आहे. त्यामुळे सोमवारी मुंबईतील नरिमन पॉइंट येथे राज्य परिवहन विभाग अपर पोलिस महासंचालक (वाहतूक) व मुंबई पोलिस वाहतूक विभाग यांच्यातर्फे आयोजित ३१व्या राज्य रस्ता सुरक्षा सप्ताह-२०२०च्या कार्यक्रमात राज्याचे मुख्यमंत्री उद्धव ठाकरे यांनी रायगड जिल्ह्याचे जिल्हाधिकारी डॉ. विजय सूर्यवंशी व पनवेलचे आरटीओ लक्ष्मण दराडे यांचा सन्मान केला.

0 Reviews

Write a Review

Goa News Hub

Read Previous

कोकणासाठी स्वतंत्र विद्यापीठ स्थापन होणार?

Read Next

राज्यातील शाळांमध्ये व्हर्च्युअल क्लासरुम उभारण्याची मुख्यमंत्र्यांची सूचना

Leave a Reply