पणजी: येता ती पणजेची पोट वेंचणूक भाजपाखातीर भोव महत्वाची थारील्ल्यान पक्षान आपली शक्त एकठाय करपाची प्रक्रिया सुरु केल्या.
बुधवारा रातीं पणजेच्या एका हॉटेलांत पक्षान महत्वाची बसका घेतली.. मुख्यमंत्री प्रमोद सावंत, पक्षाचे गोंय सरचिटणीस सतीश धोंड आनी हेर फुडारी हे बसकेक हाजीर आशिल्ले.
पणजे मोर्चेबांदणी करप आनी पक्षाचे उमेदवार सिद्धार्थ कुंकळयेकाराक चडांत चड मतां मेळोवन दिवप हि मोख पक्षान आपल्या नदरेमुखार दवरल्या.
काँग्रेसीन बाबुश मोंसेराता सारख्या बलाढ्य उमेदवाराक उबो केल्यान भाजपा मुखावेलें संकट वाडलां.. गोवा सुरक्षा मंचाचे उमेदवार सुभाष वेलिंगकार रिंगणांत आशिल्ल्यान भाजपा मुखावेलो पेच आनीकूय वाडला.
वेलिंगकार जितलीं मतां घेतलो तितलोच प्रभाव भाजपा उमेदवाराचेर जातलो हाची जाणीव तांका आसा.
दुसरेवटेन काँग्रेसीचीं मतां खावपी उमेदवार ना. आम आदमी पक्षाचो वाल्मिकी नायक हो फक्त नावाखातीर उबो रावला हेंय भाजपाक खबर आसा.
अशें परिस्थितींत आपल्या आजी – माजी आमदारांक एकढाय हाडून पुराय शक्त केंद्रित करपाचें भाजपान थारायलां.
राजेंद्र आर्लेकार, दयानंद मांद्रेकार, गणेश गांवकार सारख्या पडीक आमदारांक लेगीत एकढाय भाजपान हाडलां.. दरेक आजी आनी माजी आमदाराक एक – एक बूथ दिवपाचें थारायलां.
मनोहर पर्रीकार ह्या संवसारांत नाशिल्ल्यान भाजपाक पाणजेची वेंचणूक मात्शी जड वता.. मुख्यमंत्री प्रमोद सावंताकूय तितलो अणभव नाशिल्ल्यान पक्षाक त्रास जातात.
१९ मे दिसा जावपी वेंचणूकेंत मोंसेरात आपले पुराय तातिक रिंगणांत देवला .
काँग्रेसीनूय हि वेंचणूक आपल्या प्रतिष्ठेची करून दवरल्या.. काँग्रेसीचे चडशे फुडारी पणजेत येवन ठाण मांडून बसल्यात.
पणजे महानगरपालिका बाबुशाच्या हातांत आशिल्ल्यान ताचोच परिणाम भाजपाचेर जावपाक शकता.
आतांची परिस्थिती पळयल्यार कोण जिखतलो हें सांगप कठीण जालां.. मात २३ मे उपरांत गोंयांत राजकीय घडामोडी जातल्यो अशीं चिन्नां दिसतात.
