फाटलें वर्सभर आमी देवळांत वताली देवाच्या दर्शनाक, आयज देव आयला आमच्या घरांत भक्तांच्या दर्शनाक! देड दीस,पांच दीस, सात दीस, णव दीस असो रावतलो तो आमच्या घरांत मागीर वतलो आपल्या घरा, पूण आमी ताका सांगूक जाय
” म्हज्या मनदेवळांत
बाप्पा तूं सदांच राव!
देड दीस, पांच दीस, सात, णव दीस नाका
जल्मखाळ म्हज्या काळजांत दवरता तुका हांव!!
आयज सगल्याक वातावरण भक्तीमय जाला, श्री गणेश देवाक पुजला घरा घरांत! घर नटला, सजला घराचें देवूळ जाला श्री गजाननाच्या आगमनांत!!
देड दीस, पांच दीस, सात दीस, णव दीस सोंपले, गणेशाचें विसर्जन जालें आनी चवथ सोंपली अशें समजचें न्हय हें घर देवळा सारखे दवरचें सोबीत, सुंदर नटयिल्लें, सजयिल्लें भायल्यान तशेंच भितल्यान सदांखातीर, श्री गणेश गजाननक तुमगेर सदाच येव येव सो दिसचो ह्या अपेशेंत
देव तुमगेर आसता तेन्ना तुमी कितें करतात? वर्सा पद्दती प्रमाण सकाळी पुजा, दनपारा आरती आनी रातीक परत आरती. तिर्थ प्रसाद, महाप्रसाद, फुला आनी उजवाती जालें इतलेंच ह्याच्या खेरीज..?
सकाळी पुजा केली गेले कार्डानी खेळपाक! दनपारा आरती केली गेले गड्यानी खेळपाक! रातची आरती केली फोग लासयलो! दुडवाचो इबाड आनी वेळाचो धुंवर केलो! अशें करून बाबानो तुमी कितें मेळयलें?
खंय गेली ती पारंपारीक फुगडी, तो लेजीमाचो खेळ, घरा घरांनी भजना, किर्तना? आयचे पिडगेक हें खबर तरी आसा भजन, लेजीम, फुगडी कितें ती!
श्री गणेश देवाक तुमी हाडलो तुमच्या घरांत ताची सेवा करतले ह्या विचारांत! पांच वा सात दीस दवरलो व्हड आशिर्वाद मेळचो म्हणून ताचे कडल्यान! पूण तुमी ताची कितली सेवा केली? ताका कितलोसो खूश दवरलो? हो विचार आयला तुमच्या मनांत?
बरें जें जालें तें गेलें! आतां विसर्जनाच्या वेळार तरी मात्से समजिकायेन वागात! अशें कांयच करू नाकात जें देवाक वायट दिसपा सारखे! देव येवन तुमकां सांगचो ना, तुमी हें करू नाका म्हणून, देवाक कितें आवडटा तें तुमी समजूक जाय!
आपले विसर्जन यात्रे वेळार दुसर्याक त्रास जाल्लो देवाक नक्कीच आवडचो ना, ते खातीर दुरर्याक त्रास जाता तशें कांयच करचें न्हय! म्हणचें विसर्जनाच्या वेळार चड मोठ्यान आवाज जाता तसो डिजे वाजोवचो न्हय! तशेंच चड आवाजाचे गर्नाल फोडचे न्हय! रत्याचे एके वटेन दुसर्यो गाडयो वचूक वाट दवरची, गाडयांक तोडो वेळ राव म्हणून सांगचें न्हय! फोगोठ्यो, माराण वा सुरसुरी पेटोवन दुसर्यांच्या घरांत भितर वा पोरसांत उडवची न्हय! माराण फोगोठ्यो लावच्यो आसल्यार त्यो उकतें सुवातेर लावच्यो जेणेकरून ताचो दुसर्यांक त्राक जावंक नाका!
विसर्जन यात्रा वेळार भायर काडची, वेळार विसर्जनाच्या जाग्यार पावचे, वेळार विसर्जन करचे! ह्यो सगल्यो गजाली मोतींत दवरात! देवाचो व्हड आशिर्वाद मेळयात, नातर… देव येवन त्याच वेळार तुमकां शिराप दितलो अशें तर जावक शकना, पूण देवाचे बडयेंत आवाज ना हें मात विसर नाका!
अविनाश कुंकळकार
7875237830
