मुंबई-राष्ट्रवादी काँग्रेसच्या (शरद पवार गट) खासदार सुप्रिया सुळे यांनी नरहरी झिरवळ यांची जोरदार पाठराखण केली आहे. मंत्रालयात घडलेल्या एका प्रसंगानंतर नरहरी झिरवळ यांच्या समर्थनार्थ पुढे येत सुप्रिया सुळे यांनी अतिशय भावनिक आणि तितक्याच ठाम शब्दांत आपली भूमिका मांडली आहे. या घटनेवर प्रतिक्रिया देताना त्यांनी जुन्या आठवणींना उजाळा दिला आणि मंत्रालयातील शिष्टाचारावर बोट ठेवत घडलेल्या प्रकाराबद्दल तीव्र नाराजी व्यक्त केली.
सुप्रिया सुळे यांनी नरहरी झिरवळ यांच्यासोबत असलेल्या आपल्या जुन्या स्नेहाचा उल्लेख करताना सांगितले की, आमचे नाते हे केवळ राजकीय नसून संघर्षाच्या काळातील आहे. “आम्ही एकाच ताटात जेवलेली माणसं आहोत. जेव्हा संघर्षाचा काळ होता, तेव्हा आम्ही एकमेकांच्या सोबत उभे होतो,” अशा शब्दांत त्यांनी झिरवळ यांच्याशी असलेल्या आपल्या आपुलकीच्या संबंधाची जाणीव करून दिली. कठीण काळात सोबत असलेल्या सहकार्याबद्दल त्यांनी आदर व्यक्त केला.
मंत्रालयात घडलेल्या घटनेचा समाचार घेताना सुळे म्हणाल्या की, मंत्रालय ही राज्याची सर्वोच्च प्रशासकीय वास्तू आहे. जेव्हा एखादी व्यक्ती मंत्री म्हणून मंत्रालयात असते, तेव्हा त्या वास्तूचे आणि प्रशासनाचे प्रमुख हे राज्याचे मुख्यमंत्री असतात. या वास्तूमध्ये प्रवेश केल्यानंतर मंत्र्याकडे केवळ एका पक्षाचा प्रतिनिधी म्हणून न पाहता, एक ‘मंत्री’ म्हणून पाहिले गेले पाहिजे. तिथे पक्षाची ‘कॅटेगरी’ किंवा गटतट आणणे चुकीचे आहे.
प्रशासकीय प्रमुखाच्या अखत्यारीत असलेल्या जागेत लोकप्रतिनिधींना मिळणारी वागणूक ही सन्मानाचीच असायला हवी, असे मत त्यांनी व्यक्त केले. मात्र, ज्या पद्धतीने ही संपूर्ण घटना घडली, ते पाहून आपल्याला मोठा धक्का बसला असल्याचे सुळे यांनी स्पष्ट केले. ही घटना अशोभनीय असून ती धक्कादायक असल्याचे सांगत त्यांनी घडल्या प्रकाराचा निषेध नोंदवला आहे.
