सिंधुदुर्ग : सिंधुदुर्गात एसटी बस अपघाताचे प्रमाण दिवसेंदिवस वाढत जात आहे .पुन्हा एकदा आज मालवण – बेळणे मार्गावरील आडारी ते खैदा या चढाव व उताराच्या रस्त्यावर कणकवलीहुन मालवणच्या दिशेने येणाऱ्या भरधाव एसटी बसने तीव्र उताराच्या वळणावर समोरून येणाऱ्या टाटा पीकअप गाडीला धडक दिल्याने अपघात झाला आहे.या अपघातात दोन्ही वाहनांचे मोठं नुकसान होऊन बस मधील सात प्रवासी तर टाटा पीकअप गाडीतील चालकासह चार जण असे एकूण 11 जण किरकोळ जखमी झाले. जखमींवर मालवण ग्रामीण रुग्णालयात उपचार सुरू आहेत.
दरम्यान, या प्रकरणी निष्काळजीपणे वाहन चालवून अपघातास व दुखापतीस कारणीभूत ठरल्याप्रकरणी बस चालक संजय रामदास भिलवडकर (वय 44, रा. सोमवार पेठ मालवण) याच्यावर मालवण पोलीस ठाण्यात गुन्हा दाखल करण्यात आला आहे.
सविस्तर वृत्त असे की, मालवण एसटी आगारातील मालवण- असगणी- कणकवली ही बस नेहमीप्रमाणे मार्गक्रमणासाठी निघाली होती.
ही बस खैदा व आडारी दरम्यान उताराच्या व वळणाच्या रस्त्यावरुन मालवणच्या दिशेने येत असतानाच समोरुन येणाऱ्या मालवण मधील व्यावसायिक अमेय आनंद देसाई यांच्या ताब्यातील टाटा पीकअप (एम एच 07 पी 0817 ) गाडीला बसने धडक दिली. या धडकेत एसटी बससह टाटा पीकअप गाडीच्या दर्शनी भागाचे मोठे नुकसान झाले.
तर बस मधील जयश्री नारायण गावकर, राजदेव मकडू विश्वाकर्मा, बाळकृष्ण नारायण घाडी, लाडोबा बाळकृष्ण परब, नारायण गंगाराम गावकर, आरती आनंद हडकर, सखुबाई सखाराम धुरी या प्रवाशांना किरकोळ दुखापती झाल्या. तसेच टाटा पीकअप मधील चालक अमेय देसाई यांच्यासह शशिकांत झिलू लुडबे, हौसराज नीलकंठ पारकर, विकास तुकाजी चव्हाण यांनाही किरकोळ दुखापत झाली. जखमीना मालवण ग्रामीण रुग्णालयात दाखल करून उपचार करण्यात आले.
या अपघाताची माहिती कळताच मालवणचे पोलीस घटनास्थळी दाखल होत अपघाताचा पंचनामा केला. याबाबत टाटा पीकअपचे चालक अमेय देसाई यांनी मालवण पोलीस ठाण्यात दिलेल्या फिर्यादीनुसार बस चालक संजय रामदास भिलवडकर याच्यावर रस्त्याच्या विशिष्ट परिस्थितीकडे दुर्लक्ष करून अविचाराने व निष्काळजीपणाने भरधाव वेगात वाहन चालवून समोरुन येणाऱ्या वाहनास समोरून धडक देऊन वाहनाच्या नुकसानीस व प्रवाशांच्या दुखापतीस कारणीभूत ठरल्याप्रकरणी भा.द.वि. कलम 279, 337, 338, 427 आणि मोटार वाहन अधिनियम कलम 184 अन्वये गुन्हा दाखल करण्यात आला आहे. याबाबत पोलीस निरीक्षक प्रवीण कोल्हे यांच्या मार्गदर्शनाखाली पोलीस सुशांत पवार हे अधिक तपास करत आहे .
