(५७५ कलाकार, १७ नांदी आणि १५ देवस्थानांचा पवित्र आणि भावरम्य अविष्कार)
प्रतिनिधी:
श्री संस्थान गोकर्ण पर्तगाळी मठाच्या सार्ध पंचशताब्दी महोत्सवाच्या निमित्ताने दिनांक २७ नोव्हेंबर ते ७ डिसेंबर २०२५ या कालावधीत धार्मिक व सांस्कृतिक कार्यक्रमांची दिव्य मालिका आयोजित करण्यात आली आहे.
या पावन महोत्सवाचा एक विशेष सोहळा म्हणून मंगळवार दि. २ डिसेंबर २०२५ रोजी सायंकाळी ७.३० वाजता जिवोत्तम मंडप, पर्तगाळी येथे नांदी दर्शन हा सांस्कृतिक कार्यक्रम रसिकांसाठी सादर करण्यात येणार आहे.
मठाधीश परमपूज्य श्रीमद विद्याधीशतीर्थ स्वामी महाराज यांच्या प्रेरणा, कृपा आणि दूरदृष्टीतून आकारलेली ही अद्वितीय कलाकृती गोमंतकातील प्राचीन नाट्यपरंपरेचा सांस्कृतिक ठेवा नव्याने उजाळून देणारी ठरणार आहे. पिढ्यानपिढ्या जतन झालेल्या या परंपरेत नांदी हा नाटकाचा मंगलारंभ मानला जातो आणि आजही ती कला भक्तिभावाने जोपासली जाते.
या परंपरेचा गौरवशाली अनुभव देत १५ देवस्थानांतील नांद्या तसेच संगीत शाकुंतल आणि संगीत मानापमान या संगीत नाटकांतील दोन नामांकित नांद्या अशा एकूण १७ नांद्यांचा भव्य व पारंपरिक अविष्कार नांदी दर्शनमधून सादर होणार आहे.
या विशेष कार्यक्रमासाठी सहभागी असलेल्या १५ देवस्थानांची यादी पुढीलप्रमाणे आहे
श्री चामुंडेश्वरी देवस्थान देऊळमळ केपे
श्री महालक्ष्मी देवस्थान बांदिवडे
श्री नवदुर्गा देवस्थान मडकई
श्री मोहिनी देवस्थान सदोळशे काणकोण
श्री महालक्ष्मी देवस्थान पणजी
श्री विमलेश्वर देवस्थान रिवण
श्री देवकीकृष्ण देवस्थान माशेल
श्री वेताळ देवस्थान फातर्पा
श्री नागेश महारुद्र देवस्थान नागेशी
श्री रामनाथ देवस्थान रामनाथी
श्री लक्ष्मी मंदिर ट्रस्ट सांवरकट्टा कुंकळळी
श्री दामोदर देवस्थान जांबावली
श्री अश्वथ नारायण देवस्थान मोखर्ड काणकोण
श्री महालसा नारायणी देवस्थान मार्दोळ
श्री कामाक्षी देवस्थान शिरोडा
गोमंतकभरातून तब्बल पाचशे पंचाहत्तर कलाकार या कार्यक्रमात सहभागी होत असून संगीत, वेशभूषा आणि नाट्यशैली यांच्या शुद्ध, पारंपरिक आणि आध्यात्मिक अभिव्यक्तीतून ते रसिकांवर अमिट छाप सोडण्यास सज्ज आहेत.
या भव्य उपक्रमाचे संगीत संयोजन योगीश सांबारी यांचे असून वादनात गोपाल प्रभु ऑर्गन, दत्तराज शेट्ये तबला, केदार धामस्कर पखवाज, यतीन तळावलीकर तालवाद्य अशी अनुभवी टीम सहभागी आहे. रंगमंच व्यवस्था जितेंद्र बोरकर तर सूत्रसंचालन प्रा. भास्कर नायक करणार आहेत.
सार्ध पंचशताब्दी महोत्सवाच्या सांस्कृतिक वैभवाचा अनुभव समाजबांधवांनी प्रत्यक्ष उपस्थित राहून घ्यावा आणि नांदी दर्शन या ऐतिहासिक कलासोहळ्यातून गोमंतकाच्या समृद्ध नाट्यपरंपरेचा साक्षात्कार घडवून घ्यावा असे आवाहन आयोजकांतर्फे करण्यात आले आहे.
