महाराष्ट्राच्या राजकारणात सध्या अनपेक्षित वळणे येत असून, माजी उपमुख्यमंत्री दिवंगत अजित पवार यांच्या निधनानंतर राष्ट्रवादी काँग्रेसच्या भवितव्याबाबत मोठी चर्चा सुरू झाली आहे. विशेषतः सुनेत्रा पवार यांच्याकडे पक्षाच्या राष्ट्रीय अध्यक्षपदाची धुरा सोपवण्याच्या हालचालींना वेग आला असतानाच, आमदार रोहित पवार यांनी या प्रक्रियेत पक्षांतर्गत विरोध असल्याचा खळबळजनक दावा केला आहे. सुनेत्रा पवार यांच्या नावाला सर्वच आमदारांची संमती नसल्याचे सांगत रोहित पवारांनी राजकीय वर्तुळात खळबळ उडवून दिली आहे.
त्यांच्या माहितीनुसार, सुमारे ३५ आमदारांनी सुनेत्रा वहिनींच्या नावाला लेखी पाठिंबा दिला असला तरी, काही मोजक्या आमदारांनी आणि नेत्यांनी या प्रस्तावावर स्वाक्षरी करण्यास स्पष्ट नकार दिला आहे. हे विरोध करणारे नेते नेमके कोण आहेत आणि त्यांच्या विरोधाचे कारण काय, हा मोठा संशोधनाचा विषय असल्याचे रोहित पवार यांनी नमूद केले.
पक्षाचे ज्येष्ठ नेते प्रफुल पटेल यांनी २६ फेब्रुवारी रोजी सुनेत्रा पवार यांची अधिकृत निवड जाहीर केली जाईल असे स्पष्ट केले असले तरी, त्यापूर्वीच रोहित पवारांच्या विधानामुळे पक्षातील अंतर्गत कलह चव्हाट्यावर आला आहे. प्रफुल पटेल आणि सुनील तटकरे हे दोघे पक्ष स्वतःच्या ताब्यात घेण्याचा प्रयत्न करत असल्याच्या चर्चा सुरू असतानाच, रोहित पवारांनी केलेल्या या दाव्यामुळे या निवडी प्रक्रियेवर प्रश्नचिन्ह उपस्थित झाले आहे. या संदर्भातील सत्य परिस्थिती जाणून घेण्यासाठी माध्यमांनी थेट त्या ३५ आमदारांशी संवाद साधावा, असे आवाहनही त्यांनी यावेळी केले.
याच पत्रकार परिषदेत रोहित पवार यांनी दोन्ही राष्ट्रवादी काँग्रेस पक्षांच्या संभाव्य विलीनीकरणावरही अत्यंत भावनिक भाष्य केले. दिवंगत अजित पवार यांना आपले कुटुंब आणि दोन्ही पक्ष पुन्हा एकत्र यावेत, अशी मनापासून इच्छा होती असे त्यांनी सांगितले. अजितदादांच्या लेखी राजकीय महत्त्वाकांक्षेपेक्षा कौटुंबिक एकजूट महत्त्वाची होती. जर दोन्ही पक्ष एकत्र आले असते, तर अजित पवारांना नेतृत्वात मोठे बदल घडवून आणायचे होते. विशेषतः महाराष्ट्र प्रदेशाध्यक्षपदी एखाद्या तरुण आणि तडफदार चेहऱ्याला संधी देण्याचा त्यांचा मानस होता. यासाठी त्यांनी खासदार अमोल कोल्हे यांचे नाव निश्चित केले होते आणि म्हणूनच कोल्हे हे पक्षाच्या अनेक महत्त्वाच्या बैठकांना उपस्थित राहत असत, असा मोठा खुलासाही रोहित पवार यांनी यावेळी केला.
