लोणावळा: सलग आलेल्या सुट्ट्यांचा आनंद घेण्यासाठी पर्यटकांनी मोठ्या संख्येने बाहेर पडणे पसंत केल्यामुळे मुंबई-पुणे द्रुतगती मार्गावर आज सकाळपासूनच मोठी वाहतूक कोंडी निर्माण झाली आहे. मुंबईहून पुण्याच्या दिशेने जाणाऱ्या पर्यटकांच्या वाहनांमुळे बोरघाट आणि खंडाळा परिसरात वाहनांच्या अनेक किलोमीटरपर्यंत लांब रांगा लागल्याचे पाहायला मिळत आहे. शनिवार आणि रविवार जोडून आलेल्या सुट्ट्यांमुळे खाजगी वाहनांच्या संख्येत प्रचंड वाढ झाली असून, घाट परिसरातील चढणीवर वाहतुकीचा वेग कमालीचा मंदावला आहे.
पुण्याकडे जाणाऱ्या मार्गिकेवर वाहनांचा भार प्रचंड वाढल्याने महामार्ग पोलिसांनी परिस्थिती हाताळण्यासाठी विशेष नियोजन केले आहे. पुण्याच्या दिशेने जाणारी गर्दी कमी करण्यासाठी पोलिसांनी मुंबईकडे येणाऱ्या मार्गिकेवर काही काळासाठी ‘ब्लॉक’ घेतला आहे. मुंबईकडे जाणारी वाहतूक थांबवून पुण्याच्या दिशेने जाणारी वाहने विरुद्ध मार्गिकेवरून पुढे सोडली जात आहेत, जेणेकरून घाटातील कोंडी लवकरात लवकर फोडता येईल. या प्रक्रियेमुळे मुंबईकडे येणाऱ्या प्रवाशांनाही थोडा विलंब सहन करावा लागत असला, तरी पुण्याच्या दिशेने जाणारा खोळंबा कमी होण्यास मदत होत आहे. महामार्ग पोलीस आणि आयआरबीच्या पथकांकडून ठिकठिकाणी तैनात राहून वाहतूक सुरळीत करण्याचे प्रयत्न सुरू आहेत.
