पुणे जिल्ह्यातील इंदापूर तालुक्यातील भिगवण येथे एक अतिशय धक्कादायक आणि संतापजनक घटना समोर आली आहे, ज्यामुळे संपूर्ण परिसरात खळबळ उडाली आहे. भर दिवसा घडलेल्या या घटनेने कायदा आणि सुव्यवस्थेवर प्रश्नचिन्ह निर्माण केले आहे. अवघ्या पाच दिवसांवर लग्न येऊन ठेपलेल्या एका २१ वर्षीय तरुणीचे तिच्या आई आणि भावाच्या डोळ्यादेखत फिल्मी स्टाईलने अपहरण करण्यात आले आहे. या घटनेमुळे नागरिकांमध्ये भीतीचे वातावरण पसरले असून, आरोपींच्या या धाडसी कृत्यामुळे तीव्र संताप व्यक्त केला जात आहे.
मिळालेल्या सविस्तर माहितीनुसार, ही घटना मंगळवारी दुपारच्या सुमारास, साधारणपणे ४ वाजता भिगवण येथील प्रभाग क्रमांक ५ मध्ये घडली. पीडित तरुणी, तिची आई आणि भाऊ असे तिघे दुचाकीवरून प्रवास करत होते. याच वेळी आरोपींनी त्यांना गाठले. अपहरणकर्त्यांनी अतिशय नियोजनबद्ध पद्धतीने हे कृत्य केले. त्यांनी दुचाकीवरून जाणाऱ्या या कुटुंबाला अडवण्यासाठी त्यांच्या डोळ्यात लाल तिखट (मिरची पूड) फेकले. अचानक झालेल्या या हल्ल्यामुळे पीडित कुटुंब गोंधळून गेले आणि त्यांना काहीही सुचले नाही. याच संधीचा फायदा घेत आरोपींनी २१ वर्षीय तरुणीला बळजबरीने तिथून उचलले आणि तिचे अपहरण करून पोबारा केला.
या गंभीर प्रकरणाची दखल घेत भिगवण पोलीस ठाण्यात तातडीने गुन्हा दाखल करण्यात आला आहे. अपर पोलीस अधीक्षक गणेश बिरादार यांनी दिलेल्या माहितीनुसार, या गुन्ह्यात जाहीर हारून शेख आणि आयान हारून शेख या दोन आरोपींची नावे समोर आली आहेत. त्यांनीच आई, मुलगी आणि भावाच्या डोळ्यात मिरची पूड टाकून तरुणीचे अपहरण केले आहे. या घटनेचे गांभीर्य ओळखून पोलिसांची विविध पथके तपासासाठी रवाना करण्यात आली आहेत. आरोपींना पकडण्यासाठी परिसरातील विविध टोल नाके आणि रस्त्यांवर कडक नाकाबंदी करण्यात आली असून, पोलीस युद्धपातळीवर आरोपींचा शोध घेत आहेत.
विशेष म्हणजे, ज्या तरुणीचे अपहरण झाले आहे, तिचे लग्न अवघ्या पाच दिवसांवर आले होते. घरात लग्नाची लगबग सुरू असतानाच ही दुर्दैवी घटना घडल्याने पीडित कुटुंबावर दुखाचा डोंगर कोसळला आहे. आरोपी आणि पीडित तरुणी हे एकाच वस्तीत राहत असल्याची माहिती समोर आली आहे, मात्र हे अपहरण नेमक्या कोणत्या उद्देशाने केले गेले आहे, हे अद्याप स्पष्ट होऊ शकलेले नाही. भर दिवसा घडलेल्या या प्रकारामुळे गुन्हेगारांना पोलिसांचा धाक उरला नाही का, असा सवाल उपस्थित होत आहे.
दरम्यान, या घटनेचे पडसाद उमटण्यास सुरुवात झाली असून, हिंदू राष्ट्र संघटनेच्या वतीने या घटनेचा निषेध म्हणून बुधवारी ‘भिगवण बंद’ची हाक देण्यात आली आहे. कोणताही अनुचित प्रकार घडू नये, यासाठी पोलिसांनी परिसरात चोख बंदोबस्त ठेवला असून तपास वेगाने सुरू आहे.
