महाराष्ट्रात देवेंद्र फडणवीस यांची भाजपा विधिमंडळ पक्षाच्या नेतेपदी निवड

मुंबईतील भाजप विधिमंडळ पक्षाच्या बैठकीत देवेंद्र फडणवीस यांची एकमताने नेतेपदी निवड करण्यात आलीय. भाजपच्या नवनिर्वाचित आमदारांच्या बैठकीत फडणवीस यांची निवड करण्यात आली. निवड केल्याबद्दल फडणवीस यांनी सर्व आमदारांचे आणि नेत्यांचे आभार मानले. तसंच महायुतीचा निवडणुकीत विजय झाल्याने शिवसेना पक्षप्रमुख उद्धव ठाकरेंचेही फडणवीस यांनी आभार मानले. राज्यात पुन्हा महायुतीचचं सरकार स्थापन होईल. पुढची पाच वर्ष राज्याला स्थिर सरकार देणार आहोत. कुठल्या अफवांवर विश्वास ठेवू नका, असं देवेंद्र फडणवीस यांनी स्पष्ट केलं. भाजपचे प्रदेशाध्यक्ष चंद्रकांत पाटील यांनी देवेंद्र फडणवीस यांच्या नावाचा प्रस्ताव भाजपच्या विधिमंडळ पक्षाच्या बैठकीत मांडला. भाजपचे निरीक्षक म्हणून दिल्लीतून आलेले नरेंद्रसिंह तोमर हे यावेळी उपस्थित होते. पाटील यांनी मांडलेल्या प्रस्तावाला १० आमदारांनी अनुमोदन दिलं. त्यानंतर फडणवीस यांची भाजपच्या विधिमंडळ पक्षाच्या नेतेपदी एकमताने निवड करण्यात आली.